Медаль Рады БНР
Мэдаль выраблены з бронзы, мае круглую форму дыямэтрам 38,61 мм.
На ліцавым баку выбітыя выява гербу “Пагоня”, скрыжаваныя дубовыя галінкі і надпіс “Рада Беларускай Народнай Рэспублікі”. На адваротным баку выбіты надпіс: “100 гадоў БНР”, даты “1918” і “2018”, лаўровы вянок і беларускі шасьціканцовы крыж. Стужка Мэдалю складаецца з вэртыкальных палосаў наступных колераў і разьмешчаных у наступным парадку: шырокая белая, вузкая чорная, шырокая чырвоная, вузкая чорная, шырокая белая. Наверсе стужкі замацаваная бронзавая плянка з надпісам “B.N.R.” Шырыня стужкі – 34 мм. Дызайн Мэдаля выкананы беларускімі дызайнэрамі па замове і паводле інструкцыяў Рады БНР. Да Мэдалю дадаецца афіцыйны дыплём на беларускай мове або на беларускай і ангельскай мовах. Статут Мэдаля зацьверджаны 23 сакавіка 2018 г.
Згодна са сваім статутам, медаль уручаецца за пажыццёвыя заслугі ў працы дзеля здзяйснення ідэалаў Акту 25 сакавіка 1918 г., у тым ліку за даследванні і папулярызацыю беларушчыны, здабыццё і ўмацаванне дзяржаўнай незалежнасці Беларусі, барацьбу за свабоду і дэмакратыю ў Беларусі.
Медаль уручаецца:
— Асобам, якія адзначыліся на ніве змагання за волю і незалежнасць Беларусі,
— Выбітным грамадскім і культурніцкім дзеячам у Беларусі і сярод беларускага замежжа,
— Замежнікам, якія спрычыніліся да даследванняў і папулярызацыі Беларусі ў свеце, а таксама іншым чынам спрыялі нацыянальным інтарэсам Беларусі.
Сярод узнагароджаных — першы амбасадар ЗША ў Беларусі Дэвід Суорц і амбасадар Швэцыі ў Беларусі Стэфан Эрыксан; палітыкі і грамадскія дзеячы; ветэраны беларускага незалежніцкага руху і палітычныя вязні; даследчыкі Джым Дынглі, Арнольд Макмілін, Адам Мальдзіс; акадэмік Радзім Гарэцкі; пісьменнік Уладзімер Арлоў; стваральнікі эталону дзяржаўнага гербу «Пагоня» Аляксей Марачкін і Леў Талбузін; і многія іншыя.
Агулам узнагароджаныя больш за 130 асобаў зь Беларусі і замежжа.